كتار الغلبة!!!/ بقلم الشاعر عامر نابلسي

كَتّار الغلبة !!!

يا شايل همّي هدّي
كل تكّة بشوفك حدّي
ملاحقني متل خيالي
شوية بتغفى عَا زندي !!!

كتر الغلبة بالمعقول
مش حلوة منّك على طول
سَايق فيها عرض وطول
همّك تعرف شو بدّي !! ...

ريّحلي لحظة حالك
واهتمّلّي بأحوالك
عليّي لا تشغل بالك
مين فارقني ومين عندي ...

ما سْألتك مرّة عن شي
ولا تدّخلت بأيَّ شي
حلّ عنّي دخلك وامشي
لا بقى تتجاوز حدّي ...

شو بدّك بالقيل وقال
محسوب علينا رجّالْ
خفف حشريتك واتقال
لا تضلّك شوكة بوردي ...

عامر..